KHUNTO Invade Aldeia Kukara
Koordenador Jerál Munisípiu Ermera, Sr. Horácio Borges Borromeu hamutuk ho Komisaun Polítika Postu Administravu Hatulia husi Partidu Kmanek Haburas Unidade Nacional Timor Oan (P. KHUNTO) habelar polítika Partidu KHUNTO nian, iha Aldeia Kukara, Suku Manosae, iha Domingo, loron 19 fulan-marsu tinan 2023.
Iha intervensaun polítika, Koordenador Jerál Munisípiu Ermera, Sr. Horácio Borges Borromeu salienta, KHUNTO mak imi no imi mak KHUNTO. Imi sai kontinuadores ba Partidu KHUNTO iha Aldeia no Suku ida-ne’e. Nu’udar kontinuadores Partidu nian, ita hotu fó liman ba malu hodi kontribui ba iha Festa Demokrásia iha fulan-maiu tinan ida-ne’e.
Nia hatutan, Demokrásia la mosu derepenti de’it hanesan fali milagre ida. La’os buat ida ne’ebé harii kompletu kedas maibé harii neneik ho pasiénsia, atu demokrásia ne’e sai ita hotu nian. Atu demokrásia ne’e la’o ho susesu, ita hotu presiza kontribui ho servisu makaas, kria dame no paz durante periódu Konsolidasaun, Kampaña Eletorál no loron Eleisaun Parlamentár ne’e rasik. Ho nune’e, ita bele hetan rezultadu ida justu no kredível, hodi kontribui ba iha hametin Estadu ida, iha ita-nia hadi’a povu nia moris di’ak liu tan, apela Koordenador Jerál ne’e.
Atividade polítika ho Tema, “Konsolidasaun Reforsada Hodi Hametin Forsa Politika Nível Suku no Aldeia Hodi Fó Vitória Ba P. KHUNTO Iha Eleisaun Parlamentár Tinan 2023” ne’e, sei kontinua hala’o iha Aldeia no Suku ezistente sira iha Munisípiu Ermera.
*remata*
